Konný er fædd í Reykjavík 1960 en ólst að mestu leyti upp í Hafnarfirði. Hún hefur verið búsett frá árinu 1982 í Vestmannaeyjum. Konný hafði mjög gaman að því að teikna sem barn, en fór ekki að læra myndlist fyrr en á fullorðinsárum. Árið 1994 byrjaði hún hjá Sigurfinni Sigurfinnssyni, myndlistakennara, ári síðan fór hún í Myndlistaskóla Steinunnar Einarsdóttur, einnig tók hún kolateikningu hjá Bjarna Ólafi Magnússyni og Listasmiðju hjá Visku þar sem kennari var Gíslína Dögg Bjarkadóttir. Einnig hefur hún tekið nokkur styttri námskeið hjá Sossu, Víði Mýrmann, Þorgrími Andra og Uu Von. Mest var þetta nám í olíumálun en einnig kolateikningu og frjálsri sköpun.

Konný hefur tekið þátt í mjög mörgum samsýningunum í gegnum árin. Bæði með Myndlistaskóla Steinunnar, síðan Myndlistafélagi Vestmannaeyja, Lista og menningarfélagi Vestmannaeyja og Listþráðum sem er hópur af listamönnum sem sýndu árið 2020 og 2021 í Skálholti. Konný hefur einnig haldið eina einkasýningu.

Konný málar að mestu í olíu, en er nýbyrjuð að prufa sig áfram með akrýl. Hún hefur einnig aðeins fiktað við kola- og krítarteikningar. Á síðasta ári byrjaði hún að búa til klippimyndir og hefur það aðeins þróast út í blandaða tækni, klippimyndir með akrýl málun. Einnig hefur hún tekið mikið af ljósmyndun á síðustu árum. Innblástur kemur aðallega frá íslenskri náttúru og því sem er í kringum hana í daglega lífinu.

Konný er einn af stofnendum Myndlistarfélags Vestmannaeyja og Lista og menningarfélags Vestmannaeyja og er búin að vera í stjórn beggja félaga frá upphafi. Sýna minna