Snædís Högnadóttir er fædd í Vestmannaeyjum en uppalin í Kópavogi og býr þar í dag. Hún kemur af listamannafjölskyldu og hefur listin alltaf blundað í henni. Sem barn teiknaði hún mikið, skrifaði ljóð og sögur og hannaði föt. Þegar sköpunarhæfileikum er ekki sinnt mun þörfin alltaf brjótast fram á einhverjum tímapunkti í lífi listamannsins og nú hefur það gerst og hefur Snædís farið aftur í að rækta sköpunarhæfileikana.

Snædís sækir innblástur úr litum og fegurð náttúrunnar, hafinu, lífsreynslunni og tilfinningum. Náttúran og hafið eru stórkostlega mögnuð og blandar hún þessum þáttum saman til að skapa verk sem hver og einn getur tengt við á sinn hátt frá sinni eigin reynslu og tilfinningum.

Listanafnið sem hún kennir sig við, eða art by Sogna, kemur úr nafni Snædísar, en einnig frá orðinu SOGNA sem er ítalskt orð yfir drauma. Hún var lengi að ákveða nafn þar til hún var stödd í lítilli hönnunarbúð í Sirmione á Garda í Ítalíu. Þar kom hún auga á lítið leirlistaverk sem á stóð SOGNA, greip hún þetta sem tákn um að nota þetta listanafn og láta draumana rætast um leið.

Snædís vinnur mest með akrýl, en oft blandaða tækni inni á milli. Hún stjanar við hvert verk í dágóðan tíma þar til henni finnst verkið hafa fundið sína rödd.

Sýna minna