Rannveig Björk Gylfadóttir (Rannsý) er fædd í Reykjavík árið 1969 og ólst upp í Mosfellsbæ. Rannveig er með meistarapróf í hjúkrunarfræði og vinnur sem sérfræðingur á Landspítala. Hún er líka núvitundarkennari.

Rannveig hefur verið að þróa ljósmyndun sína síðast liðin ár og kolféll fyrir abstrakt og impressionískri-nálgun í landslagsljósmyndun. Hún "málar" m.a. myndir sínar með myndavélinni og notar til þess ICM-(intentional camera movement) tækni. Oft eru smáatriðin í forgrunni en stundum eru stærri senurnar ríkjandi. Rannveig lítur á ljósmyndunina sem núvitund og hreyfi-hugleiðslu sem færir henni slökun, gleði og vellíðan. Hún vonast til þess að þau áhrif smitist áfram til áhorfandans og að hann upplifi þannig verkin á sinn hátt. Viðfangsefni Rannveigar er náttúran í mismunandi ljósi, skuggum, lögun, mynstri og litum. Vatnið heillar hana sérstaklega hvar sem það er að finna (tjarnir, ár, fossar og sjór).

Rannveig er nemandi í Skapandi ljósmyndanámi í Ljósmyndaskólanum. Viðtöl og greinar um hana hafa birst í nokkrum þekktum blöðum um ljósmyndun á netinu, meðal annars; "On Landscape," "ICM Photography Magazine" og "Spectaculum Magazine."

Sýna minna