Jóhanna Sveinsdóttir er fædd og uppalin í Borgarfirði en flutti til Reykjavíkur á námsárunum og býr þar nú. Hún sækir innblástur til æskuslóða í sveitinni og notar til dæmis gróður við vinnslu verka sinna.

Síðustu misseri hafa skordýr og önnur dýr ratað inn á myndflötinn, þar sem þau gefa mannfólkinu auga, minna á sig og tilverurétt sinn. Þau birtast stundum sem myndhverfing og sýna vafasamt og/eða algengt atferli manna. Nöfn verkanna eru oft sótt til minninga í sveitinni og vísa í hve náttúran er samtvinnuð fólki/bændum sem lifir og hrærist þar. Daglegt líf hefur einnig óhjákvæmilega áhrif í sköpunarferlinu, og málefni samtímans er erfitt að útiloka. Listamaðurinn er eins og svampur sem dregur í sig áhrif frá daglegu lífi en hrærist jafnframt í minningum sínum og í hinu bjarta og litríka til að lifa af óvissu- og kvíðavænlegt ástand.

Jóhanna notar ýmsar þrykkaðferðir í verkum sínum og útskrifaðist úr Grafíkdeild Myndlista og handíðaskóla Íslands árið 1991. Hún veigrar sér ekki við að blanda saman aðferðum og eru flest síðari verkin hennar einþrykk sem er síðan unnið ofan í með akríllitum og fleiri efnum. Með þrykkaðferð af mjúkri plötu nær hún að fanga smáatriði úr náttúrunni svo sem æðar og fínleika laufa og stráa.

Eftir nám í Myndlista og handíðaskóla Íslands fór Jóhanna til New York og lagði stund á grafík og blandaða tækni við The Art Students League of New York á árunum 1991-1992. Hún hefur auk þess sótt ýmis námskeið og er félagsmaður í SÍM og Grafíkfélaginu. Jóhanna hefur haldið nokkrar einkasýningar, þær síðustu sumarið 2024 í Grafíksalnum og í febrúar-mars 2025 í Safnahúsi Borgarfjarðar í Borgarnesi. Þá hefur hún tekið þátt í fjölda samsýninga hérlendis og erlendis.

Sýna minna