Hans Alan er fæddur árið 1975 og ólst upp í vesturbæ Kópavogs. Hann hóf listsköpun á barnsaldri, mestmegnis teikningu en færði sig svo í málun með vatnslitum, akrýl og olíu á unglingsárum.

Hans er lærður myndlistarmaður, en hann útskrifaðist frá Listaháskóla Íslands árið 2001. Hann hélt fyrstu einkasýningu sína í Gallerí Skugga árið 2003 á lágmyndum, gerðar með blandaðri tækni, undir titlinum “Undirmyndir”. Hans hefur starfað við sjónræna sköpun í meira en 20 ár, síðari hluta þess tíma sem sjálfstætt starfandi hönnuður og listamaður.

Á þessum starfsárum hefur hann haldið þrjár einkasýningar, auk þess að teikna með hefðbundnum og stafrænum aðferðum fyrir tölvuleiki, sjónvarpsseríur og kvikmyndir. Hans hefur hannað rými fyrir verslanir, veitingahús, húsnæði undir félagsstörf og hlotið styrk úr opinberum sjóði til framleiðslu á myndlistarvöru byggðri á eigin hönnun. 

Í nær 20 ár hefur Hans stundað málunaraðferð þekkt sem "plein air" málun, þ.e.a.s. þegar listamaðurinn málar náttúrumótífið á staðnum í einni lotu. Málverk eftir Hans Alan má finna á mörgum heimilum og fyrirtækjum, bæði hér á landi og erlendis.

Sýna minna