Erna Hafnes er myndlistarmaður frá Akranesi sem vinnur fyrst og fremst með olíu á striga. Verk hennar sækja innblástur í náttúruna, lífræn form og síbreytilegt innra landslag tilfinninga. Í málverkunum mætast flæði, áferð, litir og form í leit að jafnvægi milli kyrrðar og hreyfingar.

Nýjasta serían, Innra veður, byggir á þeirri hugmynd að tilfinningar séu á stöðugri hreyfingu, líkt og veðrið sjálft. Upphafspunktur verkanna eru þrýstilínur veðurkorta sem umbreytast í lífræn form þar sem lög, litir og áferð þróast á eigin forsendum. Verkin eru unnin án fyrirfram ákveðinnar niðurstöðu og hvert þeirra verður þannig sjónræn skráning augnabliks – innra veðurs sem endurspeglar þá orku sem er til staðar í sköpunarferlinu.

Erna hefur haldið einkasýningar og tekið þátt í fjölmörgum samsýningum frá árinu 2003. Hún var valin bæjarlistamaður Akraness á árunum 2014–2015 og tók þátt í stofnun Listfélags Akraness árið 2023. Frá árinu 2026 hefur hún gegnt formennsku félagsins. Verk hennar endurspegla áhuga á tengslum manns og náttúru, þar sem áhorfandanum er boðið að staldra við og upplifa eigin tengingu við lit, form og kyrrð.

Samhliða myndlistinni hefur Erna um árabil kennt jóga. Sú vinna hefur mótað nálgun hennar að sköpun, þar sem nærvera, flæði og kyrrð endurspeglast í vinnuferlinu.

Sýna minna