Arnheiður Sigurðardóttir er fædd á Akranesi 1962 en var búsett í Reykjavík alla sína barnæsku. Hennar fyrsti myndlistarkennari var listmálarinn og lagahöfundurinn Sigfús Halldórsson heitinn sem hvatti hana til að leggja fyrir sig myndlist. Samhliða því sótti hún námskeið hjá Myndlistaskóla Reykjavíkur. Hún útskrifaðist frá listasviði Fjölbrautarskólans í Breiðholti árið 1983 og hafði þá kynnt sér hinar ýmsu form listar s.s. skúlptúr, textíl, málun, smíði og teikningu.

Arnheiður hefur lengi notið sín út í náttúrunni og tekið mikið af ljósmyndum en aldrei var blýanturinn langt undann og þangað stefndi hugurinn. Það urðu straumhvörf í lífi Arnheiðar og náttúruunnandinn var meira bundin heima en áður. Vegna veikinda eiginmans varð hún að aðstoða hann við hans listsköpun og vera hönd hans á striganum. Sameiginlegt verk þeirra hjóna er í eigu endurhæfingardeildar Eirar og sýnir skemmtiferðaskip í Sundahöfn.

Fyrstu myndirnar voru unnar í olíu en vatnslitamálun heillaði meira þar sem hún er bæði flókin og ófyrirsjáanleg því ekki er hægt að sjá fyrir hvernig pappírinn bregst við liti og vatni. Arnheiður leitast stöðugt við að þróa listsköpun sína og hefur sótt námskeið hjá erlendum listamönnum og verið virkur þátttakandi í sammálun hinna ýmsu listaskóla. Hún telur eitt að því mikilvægast sem hún hafi gert í sínu lærdómsferli það var að taka námskeið hjá kennurum frá hinum ýmsu heimshornum með ólíka stíla. Efnistök eru svo ólík á milli heimshluta og það sem er leyfilegt í einu landi þykir óhugsandi í öðru.

Abstrakt málun heillar Arnheiði hvað mest þar sem litirnir fá að njóta sín og passa verður upp á að hemja birtuna í verkinu. Hugmyndir sínar að verkum sækir Arnheiður í íslenska náttúru þar sem hún dvelur oft langdvölum norður á Ströndum þar sem einangrun og fámennið ríkir. 

Sýna minna