Árni Thor (1980) er þýsk-íslenskur samtímalistamaður sem ólst upp í 200 Kópavogi. Hann hefur undanfarin ár verið að fikra sig áfram í listsköpun sinni undir áhrifum götulistar (street art / graffiti) og pop-listar (pop art). Árni Thor er sjálflærður að mestu en hefur þó sótt ýmis námskeið og unnið með öðrum listamönnum.

Í gegnum bernsku- og unglingsárin var hjólabrettaiðkun og sú menning sem henni fylgir miklir áhrifavaldar í lífi hans. Grafísk hönnun hjólabretta, pönk-tónlist og vegglist heilluðu hann snemma. Undirgöngin í Hamraborginni, nálægt því þar sem Árni ólst upp, menningarborgin Berlín og vegglistin sem Árni sá á ferð sinni um Þýskaland sem ungur drengur, hafa alltaf heillað hann og haft mótandi áhrif á hann sem listamann.

„Hugsunin á bak við verkin er að færa vegglistaverk (street art / graffiti) sem fólk sér á veggjum í borgarumhverfinu, í minn stíl og inn á heimili fólks “

Árni notast aðallega við spreybrúsa í verkum sínum en einnig stensil (stencil), silkiþrykk (silk prints) og fríhendis aðferðir þar sem spreybrúsar og penslar vinna saman að ferskri útkomu. Listsköpun Árna hefur sína sérstöðu og það sama má segja um verkin hans, en engin tvö eru eins og mikil vinna og ást lögð í hvert og eitt þeirra. Sýna minna