Sólveig Birna Stefánsdóttir, fæddist í Reykjavík árið 1967. Hún ólst upp í Húnaþingi þar sem nándin við náttúruna og samskipti við hestana mótuðu skynjun hennar. Síðan hún fyrst man eftir sér hefur hún teiknað hesta. Hestarnir hafa haldið áfram að vera innblástur og uppáhalds viðfangsefni í listiðkun hennar. Íslenski hesturinn tengist þjóðarsál íslendinga sem órjúfanlegur hluti af fjölskylduböndunum og náttúruöflunum. Meðal fyrri áhrifavalda má nefna teikningar Halldór Péturssonar og tilþrifamikilar hestamyndir spænskætttaða listamannsins Baltasar. Líka las hún sem unglingur bækurnar Horfna Góðhesta þar sem nákvæmar og hrifnæmar lýsingar Ásgeirs frá Gotttorp kveiktu á ímyndunaraflinu.

Listabrautin heillaði og hún þráði að geta helgað líf sitt skapargleðinni. Eftir Menntaskólann á Akureyri lá vegurinn fyrst suður til Rekjavíkur þar sem hún stundaði nám í Málunardeild Myndlista og Handíðaskóla Íslands. Síðan nam hún við Listaháskólann í Þrándheimi og útskrifaðist 1993. Hún hefur tekið þátt í samsýningum víða í Evrópu og haldið einkasýningar bæði í Oslo og í Þrándheimi.

Undanfarin ár hefur hún aðallega málað með akrýllitum á striga. Eiginleikar akrýlmálningarinnar leyfa virkni í ferlinu sem skilar vel tjáningarmætti litarins og pensilstrokanna. Hún dregur líka fram mikilvægi teikningunnar bæði fyrir skilning á formi og uppbyggingu.

Sólveig hrífst af fasi og hreyfingum íslenska hestsins, krafti og mýkt ásamt hæfni hans til að leiða manneskjuna heim inn í eigið hjarta. Með verkum sínum óskar hún að miðla þeim kenndum og tilfinningum sem hestarnir vekja.

Sýna minna