Lára Garðarsdóttir er fædd 1982 í Reykjavík. Hún ólst upp í borginni og austur á Egilsstöðum. Eftir menntaskóla sótti Lára listnám á Jótlandi í Danmörku þar sem hún lagði stund á klassíska teikningu og lauk BA prófi í Character Animation frá The Animation Workshop.

Starfsreynsla Láru spannar víðan völl, en hún hefur reynslu í kvikmynda- og auglýsingagerð og starfað við ýmis teikniverkefni. Hún hefur myndskreytt fjölda barnabóka og skrifað og myndskreytt sínar eigin bækur - og hlotið viðurkenningar fyrir. Þá hefur Lára haldbæra reynslu í heimi fjölmiðla jafnt sem blaðamaður og í grafík.

Saga er samnefnari í verkum Láru en í málverkum hennar vinnur hún gjarnan portraitmyndir. Hún sækir í reglur anatómíunnar og leikur sér að því að brjóta þær niður og skoða. Myndir Láru er fígúratívar og expressívar.

Lára hefur haldið tvær einkasýningar og tekið þátt í samsýningum. Hún býr og starfar í Reykjavík.

Sýna minna