Guðrún Pétursdóttir er fædd í Hafnarfirði 1961. Strax á unga aldri fór hún að dvelja langdvölum á uppeldisbæ föður síns á sunnanverðu Snæfellsnesi. Eftir að hafa stundað nám í 10 ár í Berlín, flutti hún aftur heim í sveitina og hefur alla tíð síðan verið búsett á sama bæ og í sama húsi og hún er alin upp í að miklu leyti. Eins og sést vel á verkum Guðrúnar dregur hún alla sína sköpun og innblástur frá náttúrunni, frá stöðum sem hún hefur þekkt og tekið inn frá fæðingu. Þannig þekkir hún hraunið, fjöllin, lyngið og móann eins og lófann á sér.

Í Berlín lærði Guðrún félags- og kennslufræði og á því sviði er sköpunarþörfin nýtt til hönnunar námsefnis og kennsluaðferða auk þess sem Guðrún hefur skrifað nokkrar fræðibækur á sínu þekkingarsviði. Guðrún hefur stundað ljósmyndun frá unga aldri eða frá því hún eignaðist fyrst Canon myndavél á menntaskólaárunum. Myndavélina skildi hún sjaldan við sig og þó hún hafi ekki menntað sig á því sviði tók hún þátt í nokkrum ljósmyndasýningum í Berlín á námsárunum.

Guðrún hefur ávallt stundað bæði handverk og listir af ýmsum toga. Myndlistin hefur ætíð verið fylgifiskur ljósmyndunarinnar þar sem hún fangar augnablikin í náttúrunni ýmist á ljósmynd eða á strigann. Myndefnið er sótt í hraunið og fjöllin allt um kring en á heimahögunum er aldrei skortur á myndefni. Vinnustofan er gamli bærinn undir fjallinu þar sem náttúran skartar litskrúðugum eldfjöllum, jökli og hrauni út um alla glugga. Guðrún hefur unnið bæði með akríl og olíu en undanfarin ár hefur hún svo til eingöngu unnið með olíuliti á striga og minni verk á pappír.

Verk eftir Guðrúnu hanga víða um heim. Má þar t.d. nefna Kanada, Bandaríkin, Bretland og Þýskaland en einnig hafa þau fengið ný heimili á Íslandi. Það sem er ef til vill áhugavert varðandi verkin er eins og Guðrún segir sjálf, „fæst ykkar sjáið verkin mín eins og ég sé þau en vonandi sjáið þið sömu undur náttúrunnar þar og ég“. Þar á hún við að vegna augngalla notar hún aðeins annað augað og upplifir þannig þrívídd, dýpt og rými öðruvísi en þeir sem horfa á myndirnar með báðum augum.

Sýna minna