Fríða er fædd og uppalin í Reykjavík og sótti fyrst námskeið sem barn í Myndlistaskóla Reykjavíkur sem þá var við Freyjugötu. Árið 1993 flutti Fríða norður á Siglufjörð með eiginmanni sínum og hefur búsetan þar og lífið haft mikil áhrif og verið hvatning til að mála.

Fríða verður oft undir áhrifum frá alls konar áttum og hafa málverkin oft á tíðum verið nokkurs konar dagbækur um líðan og það sem á hug hennar og hjarta þá stundina. Hestar hafa verið Fríðu afskaplega hugleiknir. Hún og eiginmaður hennar eiga hesta og eru þeir stór partur af lífinu hennar. Fríða hefur alltaf verið rög við að fara á hestbak en fór þess í stað að mála málverk af hestunum. Hún reynir að sýna hversu flottir henni finnst þeir vera með því að mála myndir af þeim, eitthvað sem hún treystir sér ekki til að gera í hnakknum. Undanfarin ár hefur hún einnig fengið mikinn innblástur frá ægifagri náttúru í kringum heimilið sitt, Siglufjörð.

Fríða vinnur aðallega með akrýl, blýant, túss og olíupastel. Hún var valin Bæjarlistamaður Fjallabyggðar árið 2015 og hefur haldið nokkrar einkasýningar ásamt einni samsýningu í Gerðubergi.  Sýna minna