Árný Birgisdóttir

Árný Björk Birgisdóttir útskrifaðist frá Arizona State University með BA í fine art. Áherslan í náminu var vatnslitamálun en hún hefur unnið með ýmsa aðra vatnsuppleysanlega liti og málað í olíu. Þaðan lá leið hennar í meistaranám við Pratt Institute í New York þar sem hún lagði áherslu á sköpunarferlið og tjáninguna í listinni. Árný leikur sér með blöndun lita í frjálsu flæði vatnsins.

Árný tekst á við þá ögrun að skapa form úr formleysinu, ná stjórn á myndverkinu án þess að berjast gegn flæðinu, slaka á hugsuninni, tengja við sjálfa sig og gleyma sér. Sú dýrmæta reynsla sem Árný Björk fékk í Pratt af ágæti þess að tjá sig gegnum ýmis  listform leiddi til þess að hún hefur að mestu starfað með börnum við listsköpun.

Árný Björk hefur verið félagsmaður Grósku frá stofnun þess og sinnt þar ýmsum störfum. Einnig er hún félagi í Sambandi íslenskra myndlistamanna (SÍM). Árný Björk hefur tekið þátt í samsýningum og haldið einkasýningar bæði í Bandaríkjunum og á Íslandi. Hún hefur sýnt og selt í ýmsum Galleríum svo sem Gallery Reykjavík, Fold, Korku og Grásteini, sem hún tók þátt í að stofna.